ಆಟೋ-ಡೆಬಿಟ್ ಪಾವತಿ ಇನ್ನು ಸುಲಭ: OTP ಅಗತ್ಯವಿಲ್ಲ
ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಡಿಜಿಟಲ್ ಪಾವತಿಗಳನ್ನು ಮತ್ತಷ್ಟು ಸುಲಭಗೊಳಿಸಲು 'ಇ-ಮ್ಯಾಂಡೇಟ್' ನಿಯಮಗಳಲ್ಲಿ ಮಹತ್ವದ ಬದಲಾವಣೆಗಳನ್ನು ತಂದಿದೆ. ಏಪ್ರಿಲ್ 21, ಮಂಗಳವಾರದಿಂದ ಇದು ಜಾರಿಗೆ ಬರುತ್ತಿದೆ. 15,000 ರೂವರೆಗಿನ ರಿಕರಿಂಗ್ ಪೇಮೆಂಟ್ಗಳಿಗೆ ಒಟಿಪಿ ಇತ್ಯಾದಿ ಹೆಚ್ಚುವರಿ ದೃಢೀಕರಣದ ಅಗತ್ಯ ಇರುವುದಿಲ್ಲ. ಈ ಕುರಿತು ಒಂದು ವರದಿ.
ಭಾರತೀಯ ರಿಸರ್ವ್ ಬ್ಯಾಂಕ್ ಹೊಸ ಡಿಜಿಟಲ್ ಪಾವತಿ ಚೌಕಟ್ಟನ್ನು ಪ್ರಕಟಿಸಿದ್ದು, ಮರುಕಳಿಸುವ ಪಾವತಿಗಳ ಮಿತಿಯನ್ನು ಹೆಚ್ಚಿಸಿದೆ. ಇನ್ನು ಮುಂದೆ 15,000 ರೂವರೆಗಿನ ಆಟೋ-ಡೆಬಿಟ್ ಅಥವಾ ಮರುಕಳಿಸುವ ಪಾವತಿಗಳಿಗೆ ಪ್ರತಿ ಬಾರಿ OTP ನಮೂದಿಸುವ ಅಗತ್ಯವಿರುವುದಿಲ್ಲ. ಓಟಿಟಿ ಸಬ್ಸ್ಕ್ರಿಪ್ಷನ್, ಯುಟಿಲಿಟಿ ಬಿಲ್, EMI ಪಾವತಿಗಳಿಗೆ ಇದು ಅನ್ವಯಿಸುತ್ತದೆ. 15,000 ರೂ ಮೇಲ್ಪಟ್ಟ ರೆಕರಿಂಗ್.
ವಿಮಾ ಪ್ರೀಮಿಯಂ, ಮ್ಯೂಚುವಲ್ ಫಂಡ್ ಹೂಡಿಕೆ ಮತ್ತು ಕ್ರೆಡಿಟ್ ಕಾರ್ಡ್ ಬಿಲ್ ಪಾವತಿಗಳಿಗೆ ಈ ಮಿತಿಯನ್ನು ₹1 ಲಕ್ಷಕ್ಕೆ ಏರಿಸಲಾಗಿದೆ. ಅಂದರೆ 1 ಲಕ್ಷ ರೂವರೆಗಿನ ಇಂತಹ ಪಾವತಿಗಳಿಗೆ ಹೆಚ್ಚುವರಿ ದೃಢೀಕರಣ ಬೇಕಿಲ್ಲ ನೀವು ಮೊದಲ ಬಾರಿಗೆ ಆಟೋ-ಪೇ ಸೌಲಭ್ಯವನ್ನು ನೋಂದಾಯಿಸುವಾಗ ಮಾತ್ರ ಒಟಿಪಿ ಅಥವಾ ಪಿನ್ ಮೂಲಕ ದೃಢೀಕರಿಸಬೇಕಾಗುತ್ತದೆ. ಆನಂತರದ ಪಾವತಿಗಳು ನಿಗದಿತ ಮಿತಿಯಲ್ಲಿದ್ದರೆ ತಾನಾಗಿಯೇ ನಡೆಯುತ್ತವೆ.
ಹೊಸ ನಿಯಮವು ಕೇವಲ ಸೌಲಭ್ಯವನ್ನಷ್ಟೇ ಅಲ್ಲದೆ, ಗ್ರಾಹಕರ ಭದ್ರತೆಗೂ ಆದ್ಯತೆ ನೀಡಿದೆ.
ನಿಮ್ಮ ಖಾತೆಯಿಂದ ಹಣ ಕಡಿತವಾಗುವ ಕನಿಷ್ಠ 24 ಗಂಟೆಗಳ ಮೊದಲು ಬ್ಯಾಂಕ್ಗಳು ನಿಮಗೆ ನೋಟಿಫಿಕೇಶನ್ (SMS ಅಥವಾ ಇಮೇಲ್) ಕಳುಹಿಸುವುದು ಕಡ್ಡಾಯ. ಇದರಲ್ಲಿ ಹಣ ಪಡೆಯುವವರು ಯಾರು ಮತ್ತು ಎಷ್ಟು ಮೊತ್ತ ಎಂಬ ಮಾಹಿತಿ ಇರುತ್ತದೆ.
ಈ ನೋಟಿಫಿಕೇಶನ್ ಬಂದಾಗ, ಆ ನಿರ್ದಿಷ್ಟ ಪಾವತಿಯನ್ನು ತಡೆಯಲು ಅಥವಾ ಇ-ಮ್ಯಾಂಡೇಟ್ ಅನ್ನು ರದ್ದುಗೊಳಿಸಲು ಗ್ರಾಹಕರಿಗೆ ಸಂಪೂರ್ಣ ಅವಕಾಶವಿರುತ್ತದೆ.
ಇ-ಮ್ಯಾಂಡೇಟ್ ಸೌಲಭ್ಯವನ್ನು ಬಳಸಿಕೊಳ್ಳಲು ಬ್ಯಾಂಕ್ಗಳು ಗ್ರಾಹಕರಿಂದ ಯಾವುದೇ ಹೆಚ್ಚುವರಿ ಶುಲ್ಕವನ್ನು ವಸೂಲಿ ಮಾಡುವಂತಿಲ್ಲ.
ಕಾರ್ಡ್ ಬದಲಾದರೂ ತೊಂದರೆಯಿಲ್ಲ
ನಿಮ್ಮ ಡೆಬಿಟ್ ಅಥವಾ ಕ್ರೆಡಿಟ್ ಕಾರ್ಡ್ ಅವಧಿ ಮುಗಿದು ಹೊಸ ಕಾರ್ಡ್ ಬಂದರೂ, ಹಳೆಯ ಇ-ಮ್ಯಾಂಡೇಟ್ಗಳನ್ನು ಹೊಸ ಕಾರ್ಡ್ಗೆ ವರ್ಗಾಯಿಸಲು ಬ್ಯಾಂಕ್ಗಳಿಗೆ ಅನುಮತಿ ನೀಡಲಾಗಿದೆ. ಇದರಿಂದ ನೀವು ಮತ್ತೆ ನೋಂದಣಿ ಮಾಡುವ ಅಗತ್ಯವಿರುವುದಿಲ್ಲ.
ಇದರಿಂದ ಏನು ಲಾಭ?
ಸಾಮಾನ್ಯವಾಗಿ ಒಟಿಪಿ ಬರಲು ತಡವಾಗುವುದು ಅಥವಾ ನೆಟ್ವರ್ಕ್ ಸಮಸ್ಯೆಯಿಂದ ಪಾವತಿಗಳು ವಿಫಲವಾಗುತ್ತಿದ್ದವು. ಹೊಸ ನಿಯಮದಿಂದಾಗಿ ಇನ್ಶೂರೆನ್ಸ್ ಪಾವತಿ ಅಥವಾ SIP ಕಂತುಗಳು ಸರಿಯಾದ ಸಮಯಕ್ಕೆ ಪಾವತಿಯಾಗಿ, ದಂಡದಿಂದ ಪಾರಾಗಲು ಗ್ರಾಹಕರಿಗೆ ಅನುಕೂಲವಾಗಲಿದೆ.
ಈ ಬದಲಾವಣೆಗಳು ತಕ್ಷಣದಿಂದಲೇ (ಏಪ್ರಿಲ್ 21, ಮಂಗಳವಾರ) ಜಾರಿಗೆ ಬರಲಿದ್ದು, ಡಿಜಿಟಲ್ ಪಾವತಿ ವ್ಯವಸ್ಥೆಯನ್ನು ಇನ್ನಷ್ಟು ಬಲಪಡಿಸಲಿವೆ.
