ಹಾಸನ ಜಿಲ್ಲೆಯ ನಾಗರಿಕ ಸೇವೆಯಲ್ಲಿ ಪತಿ, ಪತ್ನಿ
ಒಂದೇ ಜಿಲ್ಲೆಯಲ್ಲಿ ಪತಿ ಐಎಎಸ್ ಅಧಿಕಾರಿಯಾಗಿ ಹಾಗೂ ಪತ್ನಿ ಐಪಿಎಸ್ ಅಧಿಕಾರಿಯಾಗಿ ಸೇವೆ ಸಲ್ಲಿಸುವುದು ಅತ್ಯಂತ ಅಪರೂಪದ ಸಂಗತಿಯಾಗಿದೆ
ಹಾಸನ, ಮೇ 15: ರಾಜ್ಯ ಸರ್ಕಾರ ಹೊರಡಿಸಿದ ಆದೇಶದಂತೆ ಐಎಎಸ್ ಅಧಿಕಾರಿ ಶುಭಂ ಶುಕ್ಲಾ ಅವರನ್ನು ಹಾಸನ ಜಿಲ್ಲಾ ಪಂಚಾಯತ್ನ ನೂತನ ಮುಖ್ಯ ಕಾರ್ಯನಿರ್ವಹಣಾಧಿಕಾರಿಯಾಗಿ (CEO) ನೇಮಕ ಮಾಡಲಾಗಿದೆ.
ಈ ಹಿಂದೆ ಹಾವೇರಿ ಜಿಲ್ಲೆಯ ಸವಣೂರು ಉಪವಿಭಾಗಾಧಿಕಾರಿಯಾಗಿ ಸೇವೆ ಸಲ್ಲಿಸಿದ್ದ ಅವರು ತಮ್ಮ ದಕ್ಷ ಆಡಳಿತ ಶೈಲಿಯಿಂದ ಗುರುತಿಸಿಕೊಂಡಿದ್ದರು.
ಇನ್ನೊಂದೆಡೆ, ಅವರ ಪತ್ನಿಯಾಗಿರುವ ಐಪಿಎಸ್ ಅಧಿಕಾರಿ ಎಂ.ಎಸ್. ಶುಭನ್ವಿತ ಅವರು ಈಗಾಗಲೇ ಹಾಸನ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಯಾಗಿ (SP) ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಇದರಿಂದ ಜಿಲ್ಲೆಯ ಆಡಳಿತ ಮತ್ತು ಪೊಲೀಸ್ ಇಲಾಖೆಯ ಎರಡು ಮಹತ್ವದ ಜವಾಬ್ದಾರಿಗಳು ಒಂದೇ ಕುಟುಂಬದ ಯುವ ಅಧಿಕಾರಿಗಳ ಕೈಯಲ್ಲಿ ಇರುವ ವಿಶಿಷ್ಟ ಸಂದರ್ಭ ನಿರ್ಮಾಣವಾಗಿದೆ.
ಒಂದೇ ಜಿಲ್ಲೆಯಲ್ಲಿ ಪತಿ ಐಎಎಸ್ ಅಧಿಕಾರಿಯಾಗಿ ಹಾಗೂ ಪತ್ನಿ ಐಪಿಎಸ್ ಅಧಿಕಾರಿಯಾಗಿ ಸೇವೆ ಸಲ್ಲಿಸುವುದು ಅತ್ಯಂತ ಅಪರೂಪದ ಸಂಗತಿಯಾಗಿದ್ದು, ಸಾರ್ವಜನಿಕ ವಲಯದಲ್ಲೂ ಈ ದಂಪತಿ ಬಗ್ಗೆ ವಿಶೇಷ ಚರ್ಚೆಗೆ ಕಾರಣವಾಗಿದೆ.
