Baskin Robbins: ಕರ್ನಾಟಕದಲ್ಲಿ ಬಾಸ್ಕಿನ್ ರಾಬಿನ್ಸ್‌ನ 124ನೇ ಮಳಿಗೆ ಶುಭಾರಂಭ

ಬೆಂಗಳೂರು: ವಿಶ್ವ ಪ್ರಸಿದ್ಧ ಐಸ್‌ಕ್ರೀಮ್ ಬ್ರ್ಯಾಂಡ್ 'ಬಾಸ್ಕಿನ್ ರಾಬಿನ್ಸ್' (Baskin Robbins) ಕರ್ನಾಟಕದಲ್ಲಿ ತನ್ನ 124ನೇ ಮಳಿಗೆಯನ್ನು ಇಂದು ಆರಂಭಿಸಿದೆ. ಹೊಸಕೋಟೆ ಟೋಲ್ ಸಮೀಪದ ಎಂಪೈರ್ ಹೋಟೆಲ್ ಪಕ್ಕದಲ್ಲಿ ಸುಮಾರು 600 ಚದರ ಅಡಿ ವಿಸ್ತೀರ್ಣದ ವಿಶೇಷ ಮಳಿಗೆಯನ್ನು ತೆರೆಯಲಾಗಿದ್ದು, ಐಸ್‌ಕ್ರೀಮ್ ಪ್ರಿಯರಿಗೆ ವೈವಿಧ್ಯಮಯ ರುಚಿಗಳ ಸವಿಯನ್ನು ಒದಗಿಸಲು ಸಜ್ಜಾಗಿದೆ.

ಮಳಿಗೆಯಲ್ಲಿ ಸುಮಾರು 36 ಬಗೆಯ ಐಸ್‌ಕ್ರೀಮ್‌ಗಳ ವೈವಿಧ್ಯ ಲಭ್ಯವಿದ್ದು, ಗ್ರಾಹಕರಿಗೆ ಹೊಸ ಅನುಭವ ನೀಡುವ ಉದ್ದೇಶದಿಂದ ಮಳಿಗೆಯನ್ನು ವಿನ್ಯಾಸಗೊಳಿಸಲಾಗಿದೆ. 

ಉದ್ಘಾಟನಾ ಸಮಾರಂಭದಲ್ಲಿ ಸಂಸ್ಥೆಯ ದಕ್ಷಿಣ ಭಾರತ ಮಾರುಕಟ್ಟೆ ಮುಖ್ಯಸ್ಥರು ಮಾತನಾಡಿದರು. ಹೊಸ ಮಳಿಗೆಯ ಮೂಲಕ ಈ ಭಾಗದ ಗ್ರಾಹಕರಿಗೆ ಗುಣಮಟ್ಟದ ಹಾಗೂ ವೈವಿಧ್ಯಮಯ ಐಸ್‌ಕ್ರೀಮ್‌ಗಳನ್ನು ಸುಲಭವಾಗಿ ತಲುಪಿಸುವ ಗುರಿ ಹೊಂದಲಾಗಿದೆ ಎಂದು ಹೇಳಿದರು.

1945 ರಲ್ಲಿ ಕ್ಯಾಲಿಫೋರ್ನಿಯಾದಲ್ಲಿ, ಬರ್ಟ್ ಬಾಸ್ಕಿನ್ ಹಾಗೂ ಇರ್ವ್ ರಾಬಿನ್ಸ್ ಸ್ಥಾಪಿಸಿದ 'ಬಾಸ್ಕಿನ್ ರಾಬಿನ್ಸ್' ತನ್ನ ಪ್ರಸಿದ್ಧ '31 ಫ್ಲೇವರ್ಸ್' ಪರಿಕಲ್ಪನೆಯ ಮೂಲಕ ಜಾಗತಿಕವಾಗಿ ಗುರುತಿಸಿಕೊಂಡಿದೆ. ತಿಂಗಳ ಪ್ರತಿ ದಿನವು ವಿಭಿನ್ನ ರುಚಿಯನ್ನು ಸವಿಯುವ ಅವಕಾಶ ಕಲ್ಪಿಸುವ ಉದ್ದೇಶ ಈ ಪರಿಕಲ್ಪನೆಯ ಹಿಂದಿದೆ. ಕಾಲಕ್ರಮೇಣ ಬ್ರ್ಯಾಂಡ್ 1,400ಕ್ಕೂ ಹೆಚ್ಚು ವಿಭಿನ್ನ ಐಸ್‌ಕ್ರೀಮ್ ರೆಸಿಪಿಗಳನ್ನು ಪರಿಚಯಿಸಿದೆ.

ಸ್ಕೂಪ್‌ಗಳ ಜೊತೆಗೆ ಐಸ್‌ಕ್ರೀಮ್ ಕೇಕ್, ಮಿಲ್ಕ್‌ಶೇಕ್ ಸೇರಿದಂತೆ ಹಲವು ಉತ್ಪನ್ನಗಳನ್ನು ಬ್ರ್ಯಾಂಡ್ ಗ್ರಾಹಕರಿಗೆ ನೀಡುತ್ತಿದೆ. ಹೊಸ ರುಚಿಗಳನ್ನು ಪರಿಚಯಿಸುವುದರೊಂದಿಗೆ ಸ್ಥಳೀಯ ಗ್ರಾಹಕರ ಅಭಿರುಚಿಗೂ ತಕ್ಕಂತೆ ಮೆನು ರೂಪಿಸುವುದು ಬಾಸ್ಕಿನ್ ರಾಬಿನ್ಸ್‌ನ ವಿಶೇಷತೆಯಾಗಿದೆ.

ಭಾರತದಲ್ಲಿ 1993 ರಿಂದ ಗ್ರಾವಿಸ್ ಗ್ರೂಪ್‌ನ ಜಂಟಿ ಉದ್ಯಮದ ಮೂಲಕ ಬಾಸ್ಕಿನ್ ರಾಬಿನ್ಸ್ ಕಾರ್ಯನಿರ್ವಹಿಸುತ್ತಿದ್ದು, ದೇಶದ 230ಕ್ಕೂ ಹೆಚ್ಚು ನಗರಗಳಲ್ಲಿ 800ಕ್ಕೂ ಅಧಿಕ ಪಾರ್ಲರ್‌ಗಳನ್ನು ಹೊಂದಿದೆ. ಭಾರತದಲ್ಲಿ ಲಭ್ಯವಿರುವ ಉತ್ಪನ್ನಗಳು ಸಸ್ಯಾಹಾರಿಯಾಗಿದ್ದು, ಹಸುವಿನ ಹಾಲಿನಿಂದ ತಯಾರಿಸಲಾಗುತ್ತದೆ.

ಮಿಸ್ಸಿಸ್ಸಿಪ್ಪಿ ಮಡ್, ಹನಿಕೋಂಬ್, ಕಾಟನ್ ಕ್ಯಾಂಡಿ ಸೇರಿದಂತೆ ಜನಪ್ರಿಯ ಜಾಗತಿಕ ರುಚಿಗಳ ಜೊತೆಗೆ ಟೆಂಡರ್ ಕೊಕೊನಟ್, ಮಾವಿನಹಣ್ಣು ಮುಂತಾದ ಭಾರತೀಯ ಗ್ರಾಹಕರ ಮೆಚ್ಚಿನ ರುಚಿಗಳೂ ಬಾಸ್ಕಿನ್ ರಾಬಿನ್ಸ್ ಮೆನುವಿನಲ್ಲಿವೆ.

ಕರ್ನಾಟಕದಲ್ಲಿ 124ನೇ ಮಳಿಗೆ ಆರಂಭಿಸುವ ಮೂಲಕ, ರಾಜ್ಯದ ಐಸ್‌ಕ್ರೀಮ್ ಮಾರುಕಟ್ಟೆಯಲ್ಲಿ ತನ್ನ ವ್ಯಾಪ್ತಿಯನ್ನು ಮತ್ತಷ್ಟು ವಿಸ್ತರಿಸಿರುವ ಬಾಸ್ಕಿನ್ ರಾಬಿನ್ಸ್, ಹೊಸಕೋಟೆ ಭಾಗದ ಗ್ರಾಹಕರಿಗೆ ಜಾಗತಿಕ ಗುಣಮಟ್ಟದ ಐಸ್‌ಕ್ರೀಮ್ ಅನುಭವವನ್ನು ಒದಗಿಸಲು ಮುಂದಾಗಿದೆ.