ಪುನ್ನಾಗ: ಇದರ ಉಪಯೋಗಗಳೇನು ಗೊತ್ತಾ?

'ಪುನ್ನಾಗ'ವನ್ನು ಕನ್ನಡದಲ್ಲಿ ಸುರಹೊನ್ನೆ ಅಥವಾ ಹೊನ್ನೆ ಎನ್ನಲಾಗುತ್ತದೆ. ಸಂಸ್ಕೃತದಲ್ಲಿ ಪುನ್ನಾಗ, ನಾಗಚಂಪಕ ಎಂದು ಕರೆಯುತ್ತಾರೆ. ಇದರ ಸಸ್ಯಶಾಸ್ತ್ರೀಯ ಹೆಸರು Calophyllum Inophyllum. ಇದು ಕರಾವಳಿ ಪ್ರದೇಶ, ನದಿ ದಡ & ಸಮುದ್ರ ತೀರದಲ್ಲಿ ಹೆಚ್ಚಾಗಿ ಬೆಳೆಯಬಲ್ಲ ನಿತ್ಯಹರಿದ್ವರ್ಣದ ಮಧ್ಯಮ ಗಾತ್ರದ ಮರ. ಇದು ಸುಮಾರು 20 ರಿಂದ 25 ಮೀಟರ್ ಎತ್ತರಕ್ಕೆ ಬೆಳೆಯುತ್ತದೆ.

ಈ ಮರದ ಎಲೆಗಳು ದಪ್ಪ, ಹೊಳಪುಳ್ಳ ಹಾಗೂ ಅಂಡಾಕಾರದಲ್ಲಿರುತ್ತವೆ. ಬಿಳಿ ಬಣ್ಣದ ಸುಗಂಧಭರಿತ ಹೂವುಗಳು, ಗೊಂಚಲು ರೂಪದಲ್ಲಿ ಅರಳುತ್ತವೆ. ಇದರ ಕಾಯಿ ದುಂಡಾಗಿದ್ದು, ಒಳಗೆ ಒಂದೇ ಬೀಜವಿರುತ್ತದೆ. ಬೀಜದಿಂದ ಹಳದಿ-ಹಸಿರು ಬಣ್ಣದ ಎಣ್ಣೆಯನ್ನು ತೆಗೆಯಲಾಗುತ್ತದೆ. ಇದನ್ನೇ 'ಪುನ್ನಾಗ ಎಣ್ಣೆ' ಎಂದು ಕರೆಯುತ್ತಾರೆ.

ಆಯುರ್ವೇದದ ಪ್ರಕಾರ ಪುನ್ನಾಗವು ಕಹಿ, ಒಗರು ರುಚಿ ಹೊಂದಿದ್ದು, ಶೀತ ವೀರ್ಯ ಮತ್ತು ಲಘು ಗುಣವನ್ನು ಒಳಗೊಂಡಿದೆ. ಕಫ ಹಾಗೂ ಪಿತ್ತ ದೋಷಗಳನ್ನು ನಿವಾರಿಸುತ್ತದೆ. ಇದರ ತೊಗಟೆ, ಎಲೆ, ಹೂವು, ಬೀಜ, ಎಣ್ಣೆ ಎಲ್ಲವು ಔಷಧೀಯ ಗುಣಗಳನ್ನು ಹೊಂದಿವೆ.

ಔಷಧೀಯ ಉಪಯೋಗಗಳು:

ಚರ್ಮ ರೋಗಗಳ ನಿವಾರಕ: ಪುನ್ನಾಗ ಎಣ್ಣೆಯು ಅತ್ಯುತ್ತಮ ಚರ್ಮ ರಕ್ಷಕ. ಇದು ಗಾಯ, ಹುಣ್ಣು, ತುರಿಕೆ, ಎಸ್ಜಿಮಾ, ಸೋರಿಯಾಸಿಸ್ ನಂತಹ ಚರ್ಮದ ಸಮಸ್ಯೆಗಳನ್ನು ಗುಣಪಡಿಸುತ್ತದೆ. ಆಂಟಿ-ಬ್ಯಾಕ್ಟೀರಿಯಲ್ ಮತ್ತು ಆಂಟಿ-ಇನ್ಫ್ಲಮೇಟರಿ ಗುಣಗಳಿದ್ದು, ಸೋಂಕನ್ನು ತಡೆದು ಗಾಯವನ್ನು ಬೇಗ ವಾಸಿ ಮಾಡುತ್ತದೆ.

ಸಂಧಿವಾತ & ನೋವು ನಿವಾರಣೆ: ಇದರ ಎಣ್ಣೆಯನ್ನು ಬಿಸಿ ಮಾಡಿ, ನೋವಿರುವ ಕಡೆ ಹಚ್ಚಿ ಮಸಾಜ್ ಮಾಡುವುದರಿಂದ ಸಂಧಿವಾತ, ಸ್ನಾಯು ಸೆಳೆತ ಹಾಗೂ ಉರಿಯೂತ ಕಡಿಮೆಯಾಗುತ್ತದೆ.

ಕೂದಲು ಮತ್ತು ತಲೆಹೊಟ್ಟಿಗೆ ಉಪಯುಕ್ತ: ಪುನ್ನಾಗ ಎಣ್ಣೆಯನ್ನು ತೆಂಗಿನ ಎಣ್ಣೆಯೊಂದಿಗೆ, ಬೆರೆಸಿ ತಲೆಗೆ ಹಚ್ಚುವುದರಿಂದ ಕೂದಲು ಉದುರುವುದು ನಿಲ್ಲುತ್ತದೆ. ತಲೆಹೊಟ್ಟು ನಿವಾರಣೆಯಾಗುತ್ತದೆ. ಕೂದಲು ದಟ್ಟವಾಗಿ ಬೆಳೆಯುತ್ತದೆ.

ಕಣ್ಣಿನ ಆರೋಗ್ಯಕ್ಕೆ ಒಳ್ಳೆಯದು: ಇದರ ಎಲೆಗಳ ಕಷಾಯದಿಂದ ಕಣ್ಣು ತೊಳೆಯುವುದರಿಂದ ಕಣ್ಣಿನ ಉರಿ, ಕೆಂಪು ಹಾಗೂ ಕಣ್ಣಿನ ಸೋಂಕು ದೂರವಾಗುತ್ತದೆ.

ಜೀರ್ಣಕ್ರಿಯೆಯನ್ನು ಸುಧಾರಿಸುತ್ತದೆ: ತೊಗಟೆಯ ಕಷಾಯವು ಜೀರ್ಣಶಕ್ತಿಯನ್ನು ಹೆಚ್ಚಿಸುತ್ತದೆ, ಅತಿಸಾರ, ಭೇದಿ ಮತ್ತು ಹೊಟ್ಟೆ ಹುಳವನ್ನು ನಿಯಂತ್ರಿಸಲು ಸಹಕಾರಿ.

ತಲೆನೋವು ಹಾಗೂ ಮಾನಸಿಕ ನೆಮ್ಮದಿ: ಸುಗಂಧಭರಿತ ಹೂವುಗಳ ಪರಿಮಳವು ಒತ್ತಡ, ಆತಂಕ ಮತ್ತು ತಲೆನೋವನ್ನು ಕಡಿಮೆ ಮಾಡಿ ಮನಸ್ಸಿಗೆ ಶಾಂತಿ ನೀಡುತ್ತದೆ.

ಅಲ್ಲದೆ, ಪುನ್ನಾಗ ಮರದ ದಾರು ಬಹಳ ಗಟ್ಟಿ ಮತ್ತು ನೀರಿನಲ್ಲಿ ಕೊಳೆಯುವುದಿಲ್ಲ, ಆದ್ದರಿಂದ ಇದನ್ನು ದೋಣಿ, ಪೀಠೋಪಕರಣ ಹಾಗೂ ಕಟ್ಟಡ ಸಾಮಗ್ರಿಗಳಿಗೆ ಬಳಸುತ್ತಾರೆ. ಈ ಮರವು ಹೆಚ್ಚು ಇಂಗಾಲದ ಡೈಆಕ್ಸೈಡ್ ಹೀರಿಕೊಂಡು ಗಾಳಿಯನ್ನು ಶುದ್ಧಗೊಳಿಸುತ್ತದೆ. ಮಣ್ಣಿನ ಸವೆತವನ್ನು ತಡೆಯುತ್ತದೆ. ಹಿಂದೂ ಸಂಪ್ರದಾಯದಲ್ಲಿ ಪುನ್ನಾಗವನ್ನು ಪವಿತ್ರ ಮರವೆಂದು ಪರಿಗಣಿಸಿ ದೇವಾಲಯದ ಆವರಣದಲ್ಲಿ ಬೆಳೆಸುತ್ತಾರೆ.

ಮುನ್ನೆಚ್ಚರಿಕೆ: ಪುನ್ನಾಗ ಎಣ್ಣೆಯನ್ನು ನೇರವಾಗಿ ಕುಡಿಯಬಾರದು. ಗರ್ಭಿಣಿಯರು ಮತ್ತು ಚಿಕ್ಕ ಮಕ್ಕಳು ವೈದ್ಯರ ಸಲಹೆ ಇಲ್ಲದೆ ಬಳಸಬಾರದು. ಯಾವುದೇ ಔಷಧಿಯನ್ನು ಬಳಸುವ ಮೊದಲು ಆಯುರ್ವೇದ ವೈದ್ಯರನ್ನು ಸಂಪರ್ಕಿಸುವುದು ಉತ್ತಮ.