ಸ್ವಿಗ್ಗಿ-ಜೊಮ್ಯಾಟೊ ಆಟ: ಬೆಂಗಳೂರು ಹೋಟೆಲ್ಗಳ ಸಂಘ ಖಡಕ್ ಎಚ್ಚರಿಕೆ!
Bengaluru Hotels Association: ಆನ್ಲೈನ್ ಫುಡ್ ಡೆಲಿವರಿ ದೈತ್ಯ ಸಂಸ್ಥೆಗಳಾದ ಸ್ವಿಗ್ಗಿ ಹಾಗೂ ಜೊಮ್ಯಾಟೊ ನೀತಿಯಿಂದ ಹೋಟೆಲ್ ಉದ್ಯಮಕ್ಕೆ ಕೋಟ್ಯಂತರ ರೂಪಾಯಿ ನಷ್ಟವಾಗುತ್ತಿದೆ. ಈ ನೀತಿಯನ್ನು ಆ.15ರೊಳಗೆ ಸರಿಪಡಿಸಬೇಕು ಎಂದು ಬೆಂಗಳೂರು ಹೋಟೆಲ್ಗಳ ಸಂಘ ಖಡಕ್ ಎಚ್ಚರಿಕೆ ನೀಡಿದೆ.
ಬೆಂಗಳೂರು: ಆನ್ಲೈನ್ ಫುಡ್ ಡೆಲಿವರಿ ದೈತ್ಯ ಸಂಸ್ಥೆಗಳಾದ ಸ್ವಿಗ್ಗಿ ಹಾಗೂ ಜೊಮ್ಯಾಟೊ ನೀತಿಯಿಂದ ಹೋಟೆಲ್ ಉದ್ಯಮಕ್ಕೆ ಕೋಟ್ಯಂತರ ರೂಪಾಯಿ ನಷ್ಟವಾಗುತ್ತಿದೆ ಎಂದು ಬೆಂಗಳೂರು ಹೋಟೆಲ್ಗಳ ಸಂಘ ಆರೋಪಿಸಿದೆ.
ಈ ನೀತಿಯನ್ನು ಆ.15ರೊಳಗೆ ಸರಿಪಡಿಸದಿದ್ದರೆ, ನಗರದಲ್ಲಿ ಅವುಗಳ ಸೇವೆಯನ್ನೇ ಬಂದ್ ಮಾಡಲಾಗುತ್ತದೆ. ಇಲ್ಲವೇ, ಆ್ಯಪ್ಗಳನ್ನೇ ಬಹಿಷ್ಕರಿಸಲಾಗುತ್ತದೆ ಎಂದು ಸಂಘವು ಎಚ್ಚರಿಸಿದ್ದು, ಇದರಿಂದ ಗ್ರಾಹಕರು ಹಾಗೂ ಹೋಟೆಲ್ ಮಾಲೀಕರಿಬ್ಬರಿಗೂ ತೊಂದರೆಯಾಗುತ್ತಿದೆ ಎಂದು ಸಂಘ ಹೇಳಿದೆ.
ಸಂಘದ ಆರೋಪಗಳೇನು?
* ಒತ್ತಾಯದ ಆಫರ್ ಘೋಷಣೆ: ಹೋಟೆಲ್ ಮಾಲೀಕರ ಗಮನಕ್ಕೆ ತಾರದೆ, ಸ್ವಿಗ್ಗಿ ಹಾಗೂ ಜೊಮ್ಯಾಟೊ ಆ್ಯಪ್ಗಳಲ್ಲಿ ಆಕರ್ಷಕ ಆಫರ್ಗಳನ್ನು ಘೋಷಿಸಲಾಗುತ್ತದೆ. ಆ ಆಫರ್ನ ಹೆಚ್ಚುವರಿ ಹಣವನ್ನು ಹೋಟೆಲ್ ಮಾಲೀಕರೇ ಭರಿಸಬೇಕಾಗುತ್ತದೆ. ಇದರಿಂದ ಯಾವುದೇ ರೀತಿಯಲ್ಲಿ ಲಾಭವಾಗುತ್ತಿಲ್ಲ.
* ಕ್ಯಾನ್ಸಲ್ ಆಹಾರದ ಹಣವಿಲ್ಲ: ಗ್ರಾಹಕರು ಆರ್ಡರ್ ಮಾಡಿ ಕ್ಯಾನ್ಸಲ್ ಮಾಡಿದರೆ, ಆ ತಿನಿಸಿನ ಹಣವನ್ನು ಕಂಪನಿ ಹೋಟೆಲ್ಗೆ ಕೊಡುವುದಿಲ್ಲ. ಜೊತೆಗೆ ತಿನಿಸು ವಾಪಸ್ ಬರುವುದಿಲ್ಲ. ಆ ಆಹಾರವನ್ನು ಡೆಲಿವರಿ ಬಾಯ್ಗಳೇ ತಿನ್ನುತ್ತಿದ್ದಾರೆ. ಇದರಿಂದ ಹೋಟೆಲ್ಗೆ ದುಪಟ್ಟು ನಷ್ಟವಾಗುತ್ತಿದೆ.
* ಭಾರಿ ಕಮಿಷನ್ ದೋಖಾ: ಪ್ರತಿ ಬಿಲ್ ಮೊತ್ತದಲ್ಲಿ ಶೇಕಡ 25 ರಿಂದ 30% ಕಮಿಷನ್ ಹಣವನ್ನು ಕಂಪನಿಗಳು ಕಡಿತ ಮಾಡಿಕೊಳ್ಳುತ್ತವೆ. ಜೊತೆಗೆ ಬಲವಂತವಾಗಿ ಹೋಟೆಲ್ಗಳಿಗೆ ಜಾಹೀರಾತು ವೆಚ್ಚಗಳನ್ನು ಹೇರಲಾಗುತ್ತಿದೆ. ಸಣ್ಣ ಹೋಟೆಲ್ಗಳಿಗೆ ಇದು ದೊಡ್ಡ ಹೊಡೆತವಾಗಿದೆ.
* ಗ್ರಾಹಕರಿಗೂ ವಂಚನೆ: ಆನ್ಲೈನ್ ಫುಡ್ ಆರ್ಡರ್ಗಳಿಂದ ಗ್ರಾಹಕರ ಜೇಬಿಗೂ ಕತ್ತರಿ ಬೀಳುತ್ತಿದೆ. ಹೋಟೆಲ್ನಲ್ಲಿ ರೂ.100 ಇರುವ ತಿನಿಸಿಗೆ ಆನ್ಲೈನ್ನಲ್ಲಿ ರೂ.150 ಪಾವತಿಸಬೇಕು. ಡೆಲಿವರಿ ಶುಲ್ಕ ಹಾಗೂ ಪ್ಯಾಕಿಂಗ್ ಶುಲ್ಕ ಪ್ರತ್ಯೇಕವಾಗಿದೆ.
ಹೀಗಾಗಿ, ಸರ್ಕಾರವು ತಕ್ಷಣ ಮಧ್ಯಪ್ರವೇಶಿಸಿ ಈ ಕಂಪನಿಗಳ ದೌರ್ಜನ್ಯಕ್ಕೆ ಕಡಿವಾಣ ಹಾಕಬೇಕು ಎಂದು ಬೆಂಗಳೂರು ಹೋಟೆಲ್ಗಳ ಸಂಘ ಆಗ್ರಹಿಸಿದೆ.
