ಸ್ಯಾಕ್ಸೋಫೋನ್ ನಾದದಲ್ಲಿ ಸಾಧನೆಯ ಸ್ವರ ಮೊಳಗಿಸಿದ ಸಂದೀಪ್ ದೇವಾಡಿಗ!

ಪುತ್ತೂರು: ಸಂಗೀತಕ್ಕೆ ಭಾಷೆಯ ಗಡಿಯಿಲ್ಲ. ಸ್ವರಗಳಿಗೆ ಭಾವನೆಗಳೇ ಭಾಷೆ. ಅಂತಹ ಸ್ವರಲೋಕದಲ್ಲಿ ಸ್ಯಾಕ್ಸೋಫೋನ್‌ನ ಸುಮಧುರ ನಾದದ ಮೂಲಕ ತನ್ನದೇ ಆದ ಕಲಾ ಛಾಪು ಮೂಡಿಸಿರುವವರು ಸಂದೀಪ್ ದೇವಾಡಿಗ. 

ಸ್ಥಳೀಯ ಧಾರ್ಮಿಕ ವೇದಿಕೆಗಳಿಂದ ಹಿಡಿದು ರಾಜ್ಯಮಟ್ಟದ ಪ್ರತಿಷ್ಠಿತ ಸಾಂಸ್ಕೃತಿಕ ಮಹೋತ್ಸವಗಳವರೆಗೆ ತಮ್ಮ ಸಂಗೀತ ಪ್ರತಿಭೆಯನ್ನು ಅನಾವರಣಗೊಳಿಸಿರುವ ಸಂದೀಪ್ ಅವರ ಕಲಾಸೇವೆಗೆ ಈ ಬಾರಿ ದಕ್ಷಿಣ ಕನ್ನಡ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿಯ ಗೌರವ ಲಭಿಸಿದೆ.

1988ರ ಫೆಬ್ರವರಿ 18 ರಂದು ಜನಿಸಿದ ಸಂದೀಪ್ ದೇವಾಡಿಗ ಅವರಿಗೆ ಬಾಲ್ಯದಿಂದಲೇ ಸಂಗೀತದ ಬಗ್ಗೆ ವಿಶೇಷ ಆಸಕ್ತಿ. ಈ ಆಸಕ್ತಿಯನ್ನು ಕೇವಲ ಹವ್ಯಾಸವಾಗಿ ಉಳಿಸಿಕೊಳ್ಳದೆ, ನಿರಂತರ ಅಭ್ಯಾಸ ಮತ್ತು ಗುರುಗಳ ಮಾರ್ಗದರ್ಶನದ ಮೂಲಕ ಸಂಗೀತ ಕ್ಷೇತ್ರದಲ್ಲಿ ಸಾಧನೆಯ ಹಾದಿ ಹಿಡಿದರು. ರಾಮಕೃಷ್ಣ ಭಟ್ ಅವರ ಮಾರ್ಗದರ್ಶನದಲ್ಲಿ ಎರಡು ವರ್ಷಗಳ ಕಾಲ ಶಾಸ್ತ್ರೀಯ ಸಂಗೀತ ಅಭ್ಯಾಸ ಮಾಡಿದ ಅವರು, ಸ್ಯಾಕ್ಸೋಫೋನ್ ವಾದನವನ್ನು ತಮ್ಮ ಕಲಾ ಬದುಕಿನ ಪ್ರಮುಖ ಅಭಿವ್ಯಕ್ತಿಯನ್ನಾಗಿ ರೂಪಿಸಿಕೊಂಡರು.

ಆಕಾಶವಾಣಿಯಿಂದ ಮೈಸೂರು ದಸರಾ ವೇದಿಕೆಯವರೆಗೆ:

ಸಂದೀಪ್ ಅವರ ಸಂಗೀತ ಪಯಣದಲ್ಲಿ ಮಂಗಳೂರು ಆಕಾಶವಾಣಿ ಮಹತ್ವದ ಮೈಲಿಗಲ್ಲು. 2010 ರಿಂದ ಆಕಾಶವಾಣಿಯ ಸಂಗೀತ ಕಾರ್ಯಕ್ರಮಗಳಲ್ಲಿ ಸ್ಯಾಕ್ಸೋಫೋನ್ ವಾದನದ ಮೂಲಕ ಭಾಗವಹಿಸುತ್ತಾ ಬಂದಿರುವ ಅವರು, ತಮ್ಮ ಪ್ರತಿಭೆಗೆ ವಿಶಾಲ ವೇದಿಕೆಯನ್ನು ಕಂಡುಕೊಂಡರು. 2015ರಲ್ಲಿ ಮಂಗಳೂರಿನ ವಿ4 ನ್ಯೂಸ್ ಚಾನೆಲ್ ಆಯೋಜಿಸಿದ್ದ ವಿಶೇಷ ಕಾರ್ಯಕ್ರಮದಲ್ಲಿಯೂ ತಮ್ಮ ವಾದನದ ಮೂಲಕ ಗಮನ ಸೆಳೆದಿದ್ದರು.

2016ರಲ್ಲಿ ಮಂಗಳೂರು ದಸರಾ ಮಹೋತ್ಸವದ ಸಂದರ್ಭದಲ್ಲಿ ಕುದ್ರೋಳಿ ಗೋಕರ್ಣನಾಥ ಕ್ಷೇತ್ರದಲ್ಲಿ ಸ್ಯಾಕ್ಸೋಫೋನ್ ವಾದನ ಪ್ರದರ್ಶಿಸಿದ್ದು ಅವರ ಕಲಾಪಯಣದ ಪ್ರಮುಖ ಘಟ್ಟ. 2017ರಲ್ಲಿ ವಿಶ್ವವಿಖ್ಯಾತ ಮೈಸೂರು ದಸರಾ ಮಹೋತ್ಸವದ ಕರ್ನಾಟಕ ವಾದ್ಯಸಂಗೀತ ಕಾರ್ಯಕ್ರಮದಲ್ಲಿ ಭಾಗವಹಿಸಿ ರಾಜ್ಯಮಟ್ಟದಲ್ಲಿ ತಮ್ಮ ಪ್ರತಿಭೆಯನ್ನು ಪರಿಚಯಿಸಿದರು. 2025-26ರ ಮೈಸೂರು ದಸರಾ ಮಹೋತ್ಸವದಲ್ಲಿಯೂ ಸಂಗೀತ ಕಾರ್ಯಕ್ರಮ ನೀಡುವ ಮೂಲಕ ತಮ್ಮ ಕಲಾಸೇವೆಯನ್ನು ಮುಂದುವರಿಸಿದ್ದಾರೆ.

ಧಾರ್ಮಿಕ ಮತ್ತು ಸಾಂಸ್ಕೃತಿಕ ವೇದಿಕೆಗಳಲ್ಲಿ ಸ್ವರಸೇವೆ:

ದಕ್ಷಿಣ ಕನ್ನಡ ಜಿಲ್ಲೆಯ ಧಾರ್ಮಿಕ ಹಾಗೂ ಸಾಂಸ್ಕೃತಿಕ ಪರಂಪರೆಯೊಂದಿಗೆ ಬೆಸೆದುಕೊಂಡಿರುವ ಸಂದೀಪ್ ದೇವಾಡಿಗ ಅವರು, ಹಲವು ದೇವಾಲಯಗಳ ಬ್ರಹ್ಮಕಲಶೋತ್ಸವ, ವಾರ್ಷಿಕ ಜಾತ್ರಾಮಹೋತ್ಸವ, ದಸರಾ ಉತ್ಸವ, ಗಣೇಶೋತ್ಸವ ಸೇರಿದಂತೆ ವಿವಿಧ ಧಾರ್ಮಿಕ ಕಾರ್ಯಕ್ರಮಗಳಲ್ಲಿ ಸ್ಯಾಕ್ಸೋಫೋನ್ ವಾದನದ ಮೂಲಕ ಸಂಗೀತ ಸೇವೆ ಸಲ್ಲಿಸಿದ್ದಾರೆ.

ಪುತ್ತೂರು, ಈಶ್ವರಮಂಗಲ, ಉಪ್ಪಿನಂಗಡಿ, ಆಲಂಕಾರು ಸೇರಿದಂತೆ ಜಿಲ್ಲೆಯ ವಿವಿಧ ಧಾರ್ಮಿಕ ಕ್ಷೇತ್ರಗಳಲ್ಲಿ ತಮ್ಮ ವಾದನದ ಮೂಲಕ ಭಕ್ತಿಭಾವದ ಸಂಗೀತವನ್ನು ಪ್ರಸ್ತುತಪಡಿಸಿದ್ದಾರೆ. ಪಂಚಮುಖಿ ಆಂಜನೇಯ ಕ್ಷೇತ್ರದ ಬ್ರಹ್ಮಕಲಶೋತ್ಸವ, ಪಂಚಲಿಂಗೇಶ್ವರ ದೇವಸ್ಥಾನದ ಕಾರ್ಯಕ್ರಮಗಳು, ಗಣೇಶೋತ್ಸವ ಕಲ್ಯಾಣ ಮಂಟಪ ಹಾಗೂ ಶಾರದಾ ಭಜನಾ ಮಂದಿರದ ಸಂಗೀತ ಸೇವೆ ಸೇರಿದಂತೆ ಅನೇಕ ವೇದಿಕೆಗಳಲ್ಲಿ ಭಾಗವಹಿಸಿದ್ದಾರೆ.

ಇದರೊಂದಿಗೆ ಬೆಂಗಳೂರಿನ ತ್ರಿಗುಣಾಂಬಾ ಮಠ, ಕಲ್ಲಾಣಿ ಕಲಾಮಂದಿರ, ಕೇರಳದ ಕೊಟ್ಟಾಯಂ ದೇವಸ್ವಾನ ಹಾಗೂ ಉಡುಪಿಯ ಕೃಷ್ಣ ಮಠ ಸೇರಿದಂತೆ ವಿವಿಧ ಧಾರ್ಮಿಕ ಮತ್ತು ಸಾಂಸ್ಕೃತಿಕ ಕೇಂದ್ರಗಳಲ್ಲಿಯೂ ತಮ್ಮ ಕಲಾಪ್ರತಿಭೆಯನ್ನು ಪ್ರದರ್ಶಿಸಿದ್ದಾರೆ.

2016-17ರ ದಕ್ಷಿಣ ಕನ್ನಡ ಜಿಲ್ಲಾ ಕರಾವಳಿ ಉತ್ಸವ, ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತಿನ 21ನೇ ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನದ ಸಾಂಸ್ಕೃತಿಕ ಕಾರ್ಯಕ್ರಮ ಹಾಗೂ 'ರಾಮಾಮೃತ' ಧ್ವನಿಸುರುಳಿ ಬಿಡುಗಡೆ ಸಂದರ್ಭದಲ್ಲಿಯೂ ಸ್ಯಾಕ್ಸೋಫೋನ್ ವಾದನದ ಮೂಲಕ ಗಮನ ಸೆಳೆದಿದ್ದಾರೆ.

ರೋಟರಿ ಕ್ಲಬ್ ಆಯೋಜಿಸಿದ ಕಾರ್ಯಕ್ರಮಗಳು, ಬಂಟ್ವಾಳದಲ್ಲಿ ನಡೆದ 13ನೇ ವರ್ಷದ ಗಣೇಶೋತ್ಸವ, ದಂಡನಾಯಕ ಉತ್ಸವ, ಬೆಟ್ಟದಾರಿ ಮಹಾಲಿಂಗೇಶ್ವರ ಕ್ಷೇತ್ರದ ಕಾರ್ಯಕ್ರಮಗಳು ಸೇರಿದಂತೆ ದಕ್ಷಿಣ ಕನ್ನಡ ಹಾಗೂ ಹೊರಜಿಲ್ಲೆಗಳ ನೂರಾರು ಧಾರ್ಮಿಕ, ಸಾಮಾಜಿಕ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳಲ್ಲಿ ಅವರು ಸಂಗೀತ ಸೇವೆ ಸಲ್ಲಿಸಿದ್ದಾರೆ.

ಪ್ರಶಸ್ತಿ–ಪುರಸ್ಕಾರಗಳಿಂದ ಗುರುತಿಸಿಕೊಂಡ ಸಾಧನೆ:

ಸಂದೀಪ್ ದೇವಾಡಿಗ ಅವರ ಸಂಗೀತ ಸಾಧನೆಗೆ ವಿವಿಧ ಸಂಘ-ಸಂಸ್ಥೆಗಳಿಂದ ಪ್ರಶಸ್ತಿ ಮತ್ತು ಗೌರವಗಳು ಲಭಿಸಿವೆ. 2011ರಲ್ಲಿ ರಾಜ್ಯ ನಾಗರಿಕ ಚಿರಸ್ಮರಣ ವೇದಿಕೆ, ಬೆಂಗಳೂರು ಹಾಗೂ ಡಾ. ರಾಜಕುಮಾರ್ ಕಲಾ ಕ್ಷೇತ್ರದ ವತಿಯಿಂದ 'ಜನಸೇವಾರತ್ನ ಪ್ರಶಸ್ತಿ' ನೀಡಿ ಗೌರವಿಸಲಾಗಿದೆ. ಇದೇ ಅವಧಿಯಲ್ಲಿ ಸಂಗೀತ ಕ್ಷೇತ್ರದ ಸಾಧನೆಗಾಗಿ ಅಭಿನಂದನಾ ಪ್ರಶಸ್ತಿಯೂ ಲಭಿಸಿದೆ.

ಬೆಂಗಳೂರಿನ ತ್ರಿಗುಣಾಂಬಾ ಮತ್ತು ಹರಿದಾಸ ಸೇವಾ ಪ್ರತಿಷ್ಠಾನದ ವತಿಯಿಂದ ಸಂಗೀತೋತ್ಸವ ಪ್ರಶಸ್ತಿ ನೀಡಿ ಗೌರವಿಸಲಾಗಿದೆ. 2011ರಲ್ಲಿ ಕರ್ನಾಟಕ ಕಲಾರತ್ನ ಪ್ರಶಸ್ತಿಯನ್ನು ಸ್ವೀಕರಿಸಿದ್ದಾರೆ. 2016ರಲ್ಲಿ ಸ್ನೇಹಯುತ ಸಾಂಸ್ಕೃತಿಕ ಸಂಘ ಹಾಗೂ ನೇತ್ರಾಂಜಲಿ ಸಂಸ್ಥೆಯ ಸಹಯೋಗದಲ್ಲಿ ಹೈದರಾಬಾದ್‌ನಲ್ಲಿ ನಡೆದ ದಕ್ಷಿಣ ಭಾರತ ಸಾಂಸ್ಕೃತಿಕ ಹಬ್ಬದ ಸಂದರ್ಭದಲ್ಲಿ 'ಕರ್ನಾಟಕದ ಕಲಾರತ್ನ ರಾಜ್ಯ ಪ್ರಶಸ್ತಿ'ಗೆ ಭಾಜನರಾಗಿದ್ದಾರೆ.

ಗಣ್ಯರಿಂದ ಸನ್ಮಾನ, ಕಲಾಸೇವೆಗೆ ಮನ್ನಣೆ:

ಸಂಗೀತ ಕ್ಷೇತ್ರದಲ್ಲಿ ಸಲ್ಲಿಸಿರುವ ಸೇವೆಯನ್ನು ಗುರುತಿಸಿ ಹಲವು ಗಣ್ಯರು ಹಾಗೂ ಸಂಘ-ಸಂಸ್ಥೆಗಳು ಸಂದೀಪ್ ಅವರನ್ನು ಸನ್ಮಾನಿಸಿವೆ. ಉಡುಪಿ ಕೃಷ್ಣ ಮಠದ ಶ್ರೀ ಸುಗುಣೇಂದ್ರತೀರ್ಥ ಶ್ರೀಪಾದರಿಂದ ಸನ್ಮಾನ ಸ್ವೀಕರಿಸಿರುವುದು ಅವರ ಕಲಾ ಬದುಕಿನ ಪ್ರಮುಖ ಗೌರವಗಳಲ್ಲಿ ಒಂದಾಗಿದೆ.

2013ರಲ್ಲಿ ತಾಲೂಕು ಮಟ್ಟದಲ್ಲಿ ನಡೆದ ತುಳು ಆಯನ ಕಾರ್ಯಕ್ರಮದ ಸಂದರ್ಭದಲ್ಲಿ ದಕ್ಷಿಣ ಕನ್ನಡ ಜಿಲ್ಲೆಯ ಸಂಸದರಿಂದಲೂ ಸನ್ಮಾನಿತರಾಗಿದ್ದಾರೆ. ರೋಟರಿ ಕ್ಲಬ್ ಉಪ್ಪಿನಂಗಡಿ ವತಿಯಿಂದ ಸಂಗೀತ ಕ್ಷೇತ್ರಕ್ಕೆ ನೀಡಿದ ಕೊಡುಗೆಯನ್ನು ಗುರುತಿಸಿ ರೋಟರಿ ಜಿಲ್ಲಾ ಗವರ್ನರ್ ಅವರಿಂದಲೂ ಗೌರವ ಸ್ವೀಕರಿಸಿದ್ದಾರೆ.

ಸ್ವರಸಾಧನೆಗೆ ಸಂದ ರಾಜ್ಯೋತ್ಸವ ಗೌರವ:

ಒಂದು ವಾದ್ಯವನ್ನು ನುಡಿಸುವುದು ಕಲೆಯಾದರೆ, ಅದರ ಮೂಲಕ ಜನರ ಮನಸ್ಸಿನಲ್ಲಿ ಭಾವನೆಗಳನ್ನು ಮೂಡಿಸುವುದು ನಿಜವಾದ ಕಲಾವಿದನ ಸಾಧನೆ. ಸ್ಯಾಕ್ಸೋಫೋನ್ ವಾದನವನ್ನು ಧಾರ್ಮಿಕ ಪರಂಪರೆ, ಸಾಂಸ್ಕೃತಿಕ ಅಭಿವ್ಯಕ್ತಿ ಹಾಗೂ ಸಂಗೀತದ ಸೌಂದರ್ಯದೊಂದಿಗೆ ಬೆಸೆಯುತ್ತಾ ಸಾಗಿರುವ ಸಂದೀಪ್ ದೇವಾಡಿಗ ಅವರ ಕಲಾಪಯಣ ಇದಕ್ಕೆ ಸಾಕ್ಷಿಯಾಗಿದೆ.

ಆಕಾಶವಾಣಿಯಂತಹ ಪ್ರತಿಷ್ಠಿತ ಮಾಧ್ಯಮದಿಂದ ಮೈಸೂರು ದಸರಾ ಮತ್ತು ಮಂಗಳೂರು ದಸರಾ ಮಹೋತ್ಸವಗಳಂತಹ ಪ್ರಮುಖ ವೇದಿಕೆಗಳವರೆಗೆ ತಮ್ಮ ಪ್ರತಿಭೆಯನ್ನು ವಿಸ್ತರಿಸಿರುವ ಅವರು, ನೂರಾರು ಕಾರ್ಯಕ್ರಮಗಳಲ್ಲಿ ಸಂಗೀತ ಸೇವೆ ಸಲ್ಲಿಸುವ ಮೂಲಕ ಕಲಾರಂಗದಲ್ಲಿ ತಮ್ಮದೇ ಆದ ಸ್ಥಾನ ಗಳಿಸಿದ್ದಾರೆ.

ಇದೀಗ ಅವರ ಸುದೀರ್ಘ ಕಲಾಸೇವೆ ಮತ್ತು ಸಂಗೀತ ಕ್ಷೇತ್ರದ ಕೊಡುಗೆಯನ್ನು ಗುರುತಿಸಿ ದಕ್ಷಿಣ ಕನ್ನಡ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಒಲಿದಿದೆ. ಸ್ಯಾಕ್ಸೋಫೋನ್‌ನ ನಾದದ ಮೂಲಕ ಸಂಗೀತದ ಸೌಂದರ್ಯವನ್ನು ಜನಮನಗಳಿಗೆ ತಲುಪಿಸುತ್ತಿರುವ ಸಂದೀಪ್ ದೇವಾಡಿಗ ಅವರ ಸಾಧನೆಯ ಪಯಣ, ಮುಂದಿನ ಪೀಳಿಗೆಯ ವಾದ್ಯಸಂಗೀತ ಕಲಾವಿದರಿಗೆ ಸ್ಫೂರ್ತಿಯಾಗಲಿ.