ಹೂಕೋಸು: ಇದರ ಪ್ರಯೋಜನಗಳೇನು?

ಹೂಕೋಸು (Cauliflower) ನಮ್ಮ ದೈನಂದಿನ ಅಡುಗೆಯಲ್ಲಿ ಬಳಸುವ ಅತ್ಯಂತ ಜನಪ್ರಿಯ & ಪೌಷ್ಟಿಕ ತರಕಾರಿಗಳಲ್ಲಿ ಒಂದಾಗಿದ್ದು, ನೋಡಲು ಬಿಳಿಯ ಹೂವಿನಂತೆ ಕಾಣುತ್ತದೆ. ಇದನ್ನು ಕೇವಲ ತರಕಾರಿಯಾಗಿ ಮಾತ್ರವಲ್ಲದೆ, ಔಷಧೀಯ ಗುಣಗಳನ್ನು ಹೊಂದಿರುವ ಗಿಡಮೂಲಿಕೆಯಾಗಿಯೂ ಪರಿಗಣಿಸಲಾಗುತ್ತದೆ. ವೈಜ್ಞಾನಿಕವಾಗಿ 'ಬ್ರಾಸಿಕಾ ಒಲೆರೇಸಿಯಾ' ಎಂದು ಕರೆಯಲಾಗುತ್ತದೆ. ಇದು ಬ್ರಾಸಿಕೇಸಿ ಕುಟುಂಬ ವರ್ಗಕ್ಕೆ ಸೇರಿದೆ. ಮೂಲತಃ ಮೆಡಿಟರೇನಿಯನ್ ಪ್ರದೇಶ ಸೇರಿದಂತೆ, ಪ್ರಪಂಚದಾದ್ಯಂತ ಬೆಳೆಯಲಾಗುತ್ತಿದೆ.

ಹೂಕೋಸಿನಲ್ಲಿ ಅಪಾರ ಪೌಷ್ಟಿಕಾಂಶಗಳು ಅಡಗಿವೆ. ಇದರಲ್ಲಿ ವಿಟಮಿನ್ ಸಿ, ವಿಟಮಿನ್ ಕೆ, ವಿಟಮಿನ್ ಬಿ6, ಫೋಲೇಟ್, ಪ್ಯಾಂಟೋಥೆನಿಕ್ ಆಮ್ಲ, ಪೊಟ್ಯಾಸಿಯಮ್, ಮ್ಯಾಂಗನೀಸ್, ರಂಜಕ ಮತ್ತು ಮೆಗ್ನೀಸಿಯಮ್ ಹೇರಳವಾಗಿವೆ. ಅಲ್ಲದೆ, ಇದು ಉತ್ತಮ ಪ್ರಮಾಣದ ನಾರಿನಂಶ ಹಾಗೂ ಕಡಿಮೆ ಕ್ಯಾಲೊರಿಯನ್ನು ಹೊಂದಿದ್ದು, ತೂಕ ಇಳಿಸಲು ಬಯಸುವವರಿಗೆ ವರದಾನವಾಗಿದೆ. 100 ಗ್ರಾಂ ಹೂಕೋಸಿನಲ್ಲಿ ಕೇವಲ 25 ಕ್ಯಾಲೊರಿಗಳಿರುತ್ತವೆ.

ಔಷಧೀಯ ದೃಷ್ಟಿಯಿಂದ ಹೂಕೋಸು ಅತ್ಯಂತ ಮಹತ್ವದ್ದಾಗಿದೆ. ಇದರಲ್ಲಿರುವ ಸಲ್ಫೊರಾಫೇನ್ ಎಂಬ ಸಂಯುಕ್ತವು ಪ್ರಬಲ ಆಂಟಿ-ಆಕ್ಸಿಡೆಂಟ್ ಇದ್ದು, ದೇಹದಲ್ಲಿನ ವಿಷಕಾರಿ ಅಂಶಗಳನ್ನು ಹೊರಹಾಕುತ್ತದೆ. ಕ್ಯಾನ್ಸರ್ ಕೋಶಗಳ ಬೆಳವಣಿಗೆಯನ್ನು ತಡೆಯುತ್ತದೆ. ವಿಶೇಷವಾಗಿ ಸ್ತನ, ಪ್ರಾಸ್ಟೇಟ್ ಹಾಗೂ ಕರುಳಿನ ಕ್ಯಾನ್ಸರ್ ವಿರುದ್ಧ ರಕ್ಷಣೆ ನೀಡುತ್ತದೆ ಎಂದು ಅಧ್ಯಯನಗಳು ಹೇಳುತ್ತವೆ. ಇದರಲ್ಲಿರುವ ಇಂಡೋಲ್-3-ಕಾರ್ಬಿನಾಲ್ ಹಾರ್ಮೋನ್ ಸಮತೋಲನಕ್ಕೆ ಸಹಾಯ ಮಾಡುತ್ತದೆ. ನಾರಿನಂಶವು ಜೀರ್ಣಕ್ರಿಯೆಯನ್ನು ಸುಗಮಗೊಳಿಸಿ, ಮಲಬದ್ಧತೆಯನ್ನು ನಿವಾರಿಸುತ್ತದೆ, ಕರುಳಿನ ಆರೋಗ್ಯವನ್ನು ಕಾಪಾಡುತ್ತದೆ. ವಿಟಮಿನ್ ಸಿ ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಿ, ಶೀತ ಹಾಗೂ ಸೋಂಕುಗಳಿಂದ ರಕ್ಷಿಸುತ್ತದೆ.

ಹೃದಯದ ಆರೋಗ್ಯಕ್ಕೂ ಹೂಕೋಸು ಉತ್ತಮವಾಗಿದ್ದು, ಇದು ಕೆಟ್ಟ ಕೊಲೆಸ್ಟ್ರಾಲ್ ಅನ್ನು ಕಡಿಮೆ ಮಾಡಿ, ರಕ್ತದೊತ್ತಡವನ್ನು ನಿಯಂತ್ರಿಸುತ್ತದೆ. ಇದರಲ್ಲಿರುವ ವಿಟಮಿನ್ ಕೆ ಹಾಗೂ ಒಮೆಗಾ-3 ಕೊಬ್ಬಿನಾಮ್ಲಗಳು ಉರಿಯೂತವನ್ನು ಕಡಿಮೆ ಮಾಡುತ್ತವೆ. ಮಧುಮೇಹಿಗಳಿಗೆ ಅತ್ಯುತ್ತಮ ಆಹಾರವಾಗಿದೆ. ಏಕೆಂದರೆ ಇದರ ಗ್ಲೈಸೆಮಿಕ್ ಸೂಚ್ಯಂಕ ಕಡಿಮೆಯಿದೆ. ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ಸ್ಥಿರವಾಗಿರಿಸುತ್ತದೆ. ಗರ್ಭಿಣಿಯರಿಗೆ ಫೋಲೇಟ್ ಅತ್ಯಗತ್ಯವಾಗಿದ್ದು ಭ್ರೂಣದ ಬೆಳವಣಿಗೆಗೆ ಸಹಕಾರಿಯಾಗಿದೆ. ಮೂಳೆಗಳನ್ನು ಬಲಪಡಿಸಲು, ಚರ್ಮವನ್ನು ಕಾಂತಿಯುತವಾಗಿಸಲು ಮತ್ತು ಕೂದಲಿನ ಆರೋಗ್ಯಕ್ಕೂ ಸಹಾಯಕವಾಗಿದೆ.

ಆಯುರ್ವೇದದ ಪ್ರಕಾರ, ಹೂಕೋಸು ಗುರು ಹಾಗೂ ಶೀತ ಗುಣವನ್ನು ಹೊಂದಿದೆ, ಇದು ಪಿತ್ತ ಮತ್ತು ಕಫವನ್ನು ಸಮತೋಲನಗೊಳಿಸುತ್ತದೆ. ಆದರೆ, ವಾತವನ್ನು ಸ್ವಲ್ಪ ಹೆಚ್ಚಿಸಬಹುದು. ಆದ್ದರಿಂದ ಜೀರಿಗೆ, ಶುಂಠಿ, ಕರಿಮೆಣಸಿನೊಂದಿಗೆ ಬೇಯಿಸಿದರೆ, ವಾತದ ದೋಷ ಕಡಿಮೆಯಾಗುತ್ತದೆ. ಇದನ್ನು ಸಾಂಬಾರು, ಪಲ್ಯ, ಸೂಪ್, ಪರೋಟಾ, ಬಿರಿಯಾನಿ, ಉಪ್ಪಿನಕಾಯಿ, ಸಲಾಡ್ ಮತ್ತು ಗೋಬಿ ಮಂಚೂರಿಯನ್ ನಂತಹ ಅನೇಕ ಖಾದ್ಯಗಳಲ್ಲಿ ಬಳಸಬಹುದು. ಹಸಿಯಾಗಿ ತಿಂದರೆ ಹೆಚ್ಚು ಪೋಷಕಾಂಶಗಳು ಸಿಗುತ್ತವೆ. ಆದರೆ ಅತಿಯಾಗಿ ಸೇವಿಸಿದರೆ ಹೊಟ್ಟೆಯಲ್ಲಿ ಅನಿಲ, ಉಬ್ಬರ ಮತ್ತು ಥೈರಾಯ್ಡ್ ಸಮಸ್ಯೆ ಇರುವವರಲ್ಲಿ ತೊಂದರೆ ಉಂಟಾಗಬಹುದು. ಹೀಗಾಗಿ, ಮಿತವಾಗಿ, ಚೆನ್ನಾಗಿ ಬೇಯಿಸಿ, ಶುಚಿಯಾಗಿ ತೊಳೆದು ಸೇವಿಸುವುದು ಆರೋಗ್ಯಕ್ಕೆ ಹಿತಕರ ಮತ್ತು ಬುದ್ಧಿವಂತ ಕ್ರಮವಾಗಿದೆ.

ಹೂಕೋಸು ಚಳಿಗಾಲದ ಬೆಳೆಯಾಗಿದ್ದು ತಂಪು ಹವಾಮಾನದಲ್ಲಿ ಚೆನ್ನಾಗಿ ಬೆಳೆಯುತ್ತದೆ. ಇದನ್ನು ಬೆಳೆಯಲು ಫಲವತ್ತಾದ ಮಣ್ಣು ಮತ್ತು ನಿಯಮಿತ ನೀರು ಅಗತ್ಯವಾಗಿದೆ. ಮಾರುಕಟ್ಟೆಯಲ್ಲಿ ತಾಜಾ, ಬಿಳಿ, ಗಟ್ಟಿಯಾದ ಹಾಗೂ ಕೀಟಗಳಿಲ್ಲದ ಹೂಕೋಸನ್ನು ಆಯ್ಕೆ ಮಾಡಬೇಕು. ಇದನ್ನು ಫ್ರಿಜ್‌ನಲ್ಲಿ 3-4 ದಿನಗಳವರೆಗೆ ಇಡಬಹುದು. ಒಣಗಿಸಿ ಪುಡಿ ಮಾಡಿ ಅಥವಾ ಫ್ರೋಜನ್ ಮಾಡಿ, ದೀರ್ಘಕಾಲ ಸಂಗ್ರಹಿಸಬಹುದು. ಪ್ರತಿದಿನದ ಆಹಾರದಲ್ಲಿ ಹೂಕೋಸನ್ನು ಸೇರಿಸುವುದರಿಂದ ದೇಹಕ್ಕೆ ಅಗತ್ಯವಾದ ಪೋಷಣೆ ಸಿಗುತ್ತದೆ. ಅನೇಕ ರೋಗಗಳಿಂದ ನೈಸರ್ಗಿಕವಾಗಿ ರಕ್ಷಣೆಯನ್ನು ಪಡೆಯಬಹುದು.

ಸಂಕ್ಷಿಪ್ತವಾಗಿ ಹೇಳುವುದಾದರೆ, ಹೂಕೋಸು ಕೇವಲ ರುಚಿಕರ ತರಕಾರಿಯಲ್ಲ. ಅದು ಸಂಪೂರ್ಣ ಆರೋಗ್ಯವನ್ನು ಕಾಪಾಡುವ ನೈಸರ್ಗಿಕ ಗಿಡಮೂಲಿಕೆಯಾಗಿದೆ. ಆದ್ದರಿಂದ ನಮ್ಮ ಆಹಾರ ಪದ್ಧತಿಯಲ್ಲಿ ನಿಯಮಿತವಾಗಿ ಅಳವಡಿಸಿಕೊಳ್ಳುವುದು ಉತ್ತಮ. ಪ್ರತಿಯೊಬ್ಬರೂ ಇದರ ಮಹತ್ವವನ್ನು ಅರಿತು ಆರೋಗ್ಯಕರ ಜೀವನಕ್ಕಾಗಿ ಬಳಸಿಕೊಳ್ಳಬೇಕು.