ಬಿದಿರು: ಒಂದು ಅದ್ಭುತ ಔಷಧೀಯ ಮೂಲಿಕೆ

ಬಿದಿರು 'Bambusa Arundinacea' ಎಂಬ ವೈಜ್ಞಾನಿಕ ಹೆಸರಿದ್ದು, ಹುಲ್ಲಿನ ಕುಟುಂಬಕ್ಕೆ ಸೇರಿದ ಸಸ್ಯವಾಗಿದೆ. ಇದನ್ನು ಸಾಮಾನ್ಯವಾಗಿ ಮನೆ ನಿರ್ಮಾಣ, ಬುಟ್ಟಿ ಹಾಗೂ ಕಾಗದ ತಯಾರಿಕೆಗೆ ಬಳಸುತ್ತಾರೆ. ಆದರೆ ಆಯುರ್ವೇದ ಶಾಸ್ತ್ರದಲ್ಲಿ 'ಬಿದಿರು' ಒಂದು ಶ್ರೇಷ್ಠ ಮೂಲಿಕೆ ಎಂದು ಪರಿಗಣಿಸಲಾಗಿದೆ. ಇದರ ಚಿಗುರು, ಎಲೆ, ಬೇರು ಮತ್ತು ಕಾಂಡದ ಒಳಗಿನ ಸ್ರಾವ ಎಲ್ಲವು ಔಷಧೀಯ ಗುಣಗಳನ್ನು ಹೊಂದಿವೆ.

ಬಿದಿರಿನ ಅತ್ಯಂತ ಪ್ರಸಿದ್ಧ ಔಷಧಿ ಎಂದರೆ ವಂಶಲೋಚನ ಅಥವಾ ಬಿದಿರುಪ್ಪು. ಬಿದಿರಿನ ಕಾಂಡದ ಗಂಟುಗಳಲ್ಲಿ ಸಂಗ್ರಹವಾಗುವ ಬಿಳಿ, ಸ್ಫಟಿಕದಂತಹ ಸ್ರಾವವೇ ವಂಶಲೋಚನ. ಇದು ತಂಪು ಕಾರಕ, ಸಿಹಿ ರುಚಿಯನ್ನು ಹೊಂದಿರುತ್ತದೆ. ಆಯುರ್ವೇದದ ಪ್ರಕಾರ, ಇದು ಕಫಹಾಗೂ  ಪಿತ್ತ ದೋಷವನ್ನು ನಿವಾರಿಸುತ್ತದೆ. ಕೆಮ್ಮು, ಅಸ್ತಮಾ, ಕ್ಷಯ, ಜ್ವರ, ಮೂಗಿನಿಂದ ರಕ್ತಸ್ರಾವದಂತಹ ಸಮಸ್ಯೆಗಳಿಗೆ ವಂಶಲೋಚನವನ್ನು ಜೇನುತುಪ್ಪದೊಂದಿಗೆ ನೀಡಲಾಗುತ್ತದೆ. ಜೊತೆಗೆ ಶ್ವಾಸನಾಳವನ್ನು ಶುದ್ಧಗೊಳಿಸಿ, ಶ್ವಾಸಕೋಶಕ್ಕೆ ಬಲ ನೀಡುತ್ತದೆ.

ಬಿದಿರಿನ ಎಳೆಯ ಚಿಗುರು ಆರೋಗ್ಯಕ್ಕೆ ವರದಾನವಾಗಿದೆ. ಇದರಲ್ಲಿ ನಾರಿನಂಶ, ಪ್ರೋಟೀನ್, ಪೊಟ್ಯಾಸಿಯಂ, ಸಿಲಿಕಾ ಅಂಶ ಹೇರಳವಾಗಿದೆ. ಇದರ ನಿಯಮಿತ ಸೇವನೆಯು ಜೀರ್ಣಕ್ರಿಯೆಯನ್ನು ಸುಧಾರಿಸುತ್ತದೆ, ಮಲಬದ್ಧತೆಯನ್ನು ನಿವಾರಿಸುತ್ತದೆ. ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ನಿಯಂತ್ರಿಸಲಿದ್ದು, ಕೊಲೆಸ್ಟ್ರಾಲ್ ಕಡಿಮೆ ಮಾಡಲು ಸಹಕಾರಿಯಾಗಿದೆ. ಆದ್ದರಿಂದ ಮಧುಮೇಹ  ಹಾಗೂ ಹೃದಯ ರೋಗಿಗಳಿಗೆ ಉತ್ತಮ ಆಹಾರವಾಗಿದೆ.

ಬಿದಿರಿನ ಎಲೆಗಳ ಕಷಾಯವು ಅನೇಕ ರೋಗಗಳಿಗೆ ಮನೆಮದ್ದಾಗಿದೆ. ಎಲೆಗಳನ್ನು ಕುದಿಸಿ ಕುಡಿಯುವುದರಿಂದ ಹೊಟ್ಟೆ ಹುಳ, ಗ್ಯಾಸ್, ಅಜೀರ್ಣ ನಿವಾರಣೆಯಾಗುತ್ತದೆ. ಇದು ರಕ್ತವನ್ನು ಶುದ್ಧೀಕರಿಸಿ ಚರ್ಮದ ಕಾಂತಿ ಹೆಚ್ಚಿಸುತ್ತದೆ. ಮುಟ್ಟಿನ ಸಮಸ್ಯೆ ಇರುವ ಮಹಿಳೆಯರಿಗೆ ಎಲೆಯ ಕಷಾಯ ತುಂಬಾ ಉಪಯುಕ್ತವಾಗಿದೆ.

ಬಿದಿರಿನ ಬೇರನ್ನು ಮೂತ್ರಕೋಶದ ಸಮಸ್ಯೆ, ಮೂತ್ರದಲ್ಲಿ ಉರಿ ಮತ್ತು ಕಿಡ್ನಿ ಕಲ್ಲುಗಳಿಗೆ ಬಳಸುತ್ತಾರೆ. ಬಿದಿರಿನಲ್ಲಿರುವ ಸಿಲಿಕಾ ಅಂಶವು ಮೂಳೆ, ಕೂದಲು, ಉಗುರುಗಳನ್ನು ಬಲಪಡಿಸುತ್ತದೆ. ಆದ್ದರಿಂದ ಇದನ್ನು ಸಂಧಿವಾತ ಹಾಗೂ ಆಸ್ಟಿಯೊಪೊರೋಸಿಸ್ ನಿವಾರಣೆಗೆ ಬಳಸಲಾಗುತ್ತದೆ.

ಬಿದಿರು ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುವ, ದೇಹಕ್ಕೆ ಶಕ್ತಿ ನೀಡುವ ನೈಸರ್ಗಿಕ ಮೂಲಿಕೆಯೂ ಆಗಿದೆ. ಪರಿಸರವನ್ನು ಶುದ್ಧೀಕರಿಸುವ ಈ ಸಸ್ಯ, ಮಾನವನ ಆರೋಗ್ಯವನ್ನೂ ಕಾಪಾಡುತ್ತದೆ. ಹೀಗಾಗಿ, ಬಿದಿರು ಕೇವಲ ಸಸ್ಯವಲ್ಲ, ಪ್ರಕೃತಿ ನೀಡಿದ ಅಮೂಲ್ಯ ಔಷಧಿ ಭಂಡಾರವಾಗಿದೆ.

Day2day News ನವ ಮಾಧ್ಯಮದ ವೃತ್ತಿಪರ ಡಿಜಿಟಲ್‌ ಮಾಧ್ಯಮ ಸಂಸ್ಥೆ. ವೆಬ್‌ ನ್ಯೂಸ್‌ ಪೋರ್ಟಲ್‌ನಿಂದ ಹಿಡಿದು ಇನ್‌ಸ್ಟಾ, ಎಕ್ಸ್, ಫೇಸ್‌ಬುಕ್‌, ಯೂಟ್ಯೂಬ್‌, ನ್ಯೂಸ್‌ ಆಪ್‌ವರೆಗೆ ಎಲ್ಲ ಡಿಜಿಟಲ್‌ ಪ್ಲಾಟ್‌ಫಾರ್ಮ್‌ಗಳಲ್ಲಿ ಸುದ್ದಿ - ಮಾಹಿತಿಯನ್ನು ಸರಳ, ಸಂಕ್ಷಿಪ್ತವಾಗಿ ನೀಡುತ್ತದೆ. ಜತೆಗೆ Day2day Short News ಕರ್ನಾಟಕದ ಮೊದಲ ಶಾರ್ಟ್‌ ಆಪ್‌. Swipe ಮಾಡಿ ಸುದ್ದಿ ಓದಿ. ನಮ್ಮ ಎಲ್ಲ ಪ್ಲಾಟ್‌ಫಾರ್ಮ್‌ಗಳಲ್ಲಿ ಸುದ್ದಿ & ಜಾಹೀರಾತು ನೀಡಲು 7070708646ಗೆ ಸಂಪರ್ಕಿಸಿ.